Благословен Бог наш всегда, ныне и присно, и во веки веков. Аминь.
Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Или ХВ трижды.
Святый Боже, Святый Крепкий, Святый Безсмертный, помилуй нас. Трижды.
Слава Отцу, и Сыну, и Святому Духу, и ныне и присно, и во веки веков. Аминь.
Пресвятая Троице, помилуй нас: Господи, очисти грехи наша: Владыко, прости беззакония наша: Святый, посети и исцели немощи наша, имене Твоего ради.
Господи, помилуй. Трижды.
Слава, и ныне:
Отче наш, Иже еси на небесех, да святится имя Твое, да приидет Царствие Твое: да будет воля Твоя, яко на небеси и на земли. Хлеб наш насущный даждь нам днесь, и остави нам долги наша, якоже и мы оставляем должником нашым: и не введи нас во искушение, но избави нас от лукаваго яко Твое есть царство, и сила, и слава, Отца, и Сына, и святаго Духа, ныне и присно, и во веки веков. Аминь.
Помилуй нас, Господи, помилуй нас; всякаго бо ответа недоумеюще, сию Ти молитву яко Владыце грешнии приносим: помилуй нас.
Слава: Господи, помилуй нас, на Тя бо уповахом, не прогневайся на ны зело, ниже помяни беззаконий наших: но призри и ныне яко благоутробен, и избави ны от враг наших: Ты бо еси Бог наш, и мы людие Твои, вси дела руку Твоею, и имя Твое призываем.
И ныне: Милосердия двери отверзи нам, благословенная Богородице, надеющиися на Тя да не погибнем, но да избавимся Тобою от бед: Ты бо еси спасение рода христианскаго.
Пречистому образу Твоему покланяемся, Благий, просяще прощения прегрешений наших, Христе Боже: волею бо благоволил еси плотию взыти на крест, да избавиши, яже создал еси, от работы вражия. Тем благодарственно вопием Ти: радости исполнил еси вся, Спасе наш, пришедый спасти мир.
Милосердия сущи источник, милости сподоби нас, Богородице, призри на люди согрешившыя, яви яко присно силу твою: на тя бо уповающе, радуйся, вопием ти яко иногда Гавриил безплотных архистратиг.
Господи, низпосли руку Твою с высоты святаго жилища Твоего и укрепи мя в предлежащую службу Твою: да неосужденно предстану страшному Престолу Твоему и безкровное священнодействие совершу, яко Твоя есть сила и слава во веки веков. Аминь.
Вниду в дом Твой, поклонюся ко храму святому Твоему в страсе Твоем. Господи, настави мя правдою Твоею, враг моих ради исправи пред Тобою путь мой. Яко несть во устех их истины, сердце их суетно, гроб отверст гортань их, языки своими льщаху. Суди им, Боже, да отпадут от мыслей своих, по множеству нечестия их изрини я, яко преогорчиша Тя, Господи. И да возвеселятся вси уповающии на Тя, во веки возрадуются, и вселишися в них, и похвалятся о Тебе любящии имя Твое. Яко Ты благословиши праведника, Господи, яко оружием благоволения венчал еси нас.
Боже, очисти мя, грешнаго, и помилуй мя.
Облачение
Благословен Бог наш всегда, ныне и присно, и во веки веков.
Возрадуется душа моя о Господе, облече бо мя в ризу спасения и одеждею веселия одея мя, яко жениху возложи ми венец, и яко невесту украси мя красотою.
Благословен Бог, изливаяй благодать свою на священники своя, яко миро на главе, сходящее на браду, браду аароню, сходящее на ометы одежды его.
Благословен Бог, препоясуяй мя силою, и положи непорочен путь мой, совершаяй нозе мои яко елени, и на высоких поставляяй мя.
Десница Твоя, Господи, прославися в крепости, десная Твоя рука, Господи, сокруши враги, и множеством славы Твоея стерл еси супостаты.
Руце Твои сотвористе мя и создасте мя: вразуми мя, и научуся заповедем Твоим.
Священницы Твои, Господи, облекутся в правду, и преподобнии Твои радостию возрадуются всегда: ныне, и присно, и во веки веков. Аминь.
Умыю в неповинных руце мои и обыду жертвенник Твой, Господи, еже услышати ми глас хвалы Твоея и поведати вся чудеса Твоя. Господи, возлюбих благолепие дому Твоего и место селения славы Твоея. Да не погубиши с нечестивыми душу мою и с мужи кровей живота моего: ихже в руках беззакония, десница их исполнися мзды. Аз же незлобием моим ходих: избави мя, Господи, и помилуй мя. Нога моя ста на правоте, в церквах благословлю Тя, Господи.
Боже, очисти мя, грешного, и помилуй мя. Трижды.
Искупил ны еси от клятвы законныя честною Твоею Кровию: на Кресте пригвоздився, и копием прободся, безсмертие источил еси человеком: Спасе наш, слава Тебе.
Благословен Бог наш всегда, ныне и присно, и во веки веков. Аминь.
В воспоминание Господа и Бога и Спаса нашего Иисуса Христа.
Яко овча на заколение ведеся.
И яко агнец непорочен, прямо стригущаго его безгласен, тако не отверзает уст своих.
Во смирении Его суд Его взятся.
Род же Его кто исповесть.
Яко вземлется от земли живот Его.
Жрется агнец божий, вземляй грехи мира, за мирский живот и спасение.
Един от воин копием ребра Его прободе, и абие изыде кровь и вода, и видевый свидетельствова, и истинно есть свидетельство его.
В честь и память Преблагословенныя Владычицы нашея Богородицы и Приснодевы Марии, Ея же молитвами приими, Господи, жертву сию в пренебесный Твой Жертвенник.
Предста Царица одесную Тебе, в ризы позлащенны одеяна, преукрашенна.
Честнаго славнаго Пророка, Предтечи и Крестителя Иоанна.
Святых славных пророков Моисея и Аарона, Илии и Елисея, Давида и Иессея, святых триех отроков, и Даниила пророка, и всех святых пророков.
Святых славных и всехвальных апостолов Петра и Павла и прочих всех святых апостолов.
Иже во святых отец наших, святителей Василия Великаго, Григория Богослова и Иоанна Златоустаго, Афанасия и Кирилла, Николая Мирликийскаго, Никиты, епископа Новгородскаго, Леонтия, епископа Ростовскаго, и всех святых святителей.
Святаго апостола первомученика и архидиакона Стефана, святых великих мучеников Димитрия, Георгия, Феодора Тирона, Феодора Стратилата и всех святых мученик, и мучениц Феклы, Варвары, Кириакии, Евфимии и Параскевы, Екатерины и всех святых мучениц.
Преподобных и богоносных отец наших Антония, Евфимия, Саввы, Онуфрия, Афанасия Афонскаго, Антония и Феодосия Печерских, Сергия Радонежскаго, Варлаама Хутынскаго, и всех преподобных отец; и преподобных матерей Пелагии, Феодосии, Анастасии, Евпраксии, Февронии, Феодулии, Евфросинии, Марии Египтяныни и всех святых преподобных матерей.
Святых и чудотворцев бессребреник Космы и Дамиана, Кира и Иоанна, Пантелеимона и Ермолая и всех святых бессребреников.
Святых и праведных Богоотец Иоакима и Анны: святых равноапостольных Мефодия и Кирилла, учителей словенских: святаго равноапостольнаго великаго князя Владимира, и всех святых, ихже молитвами посети ны, Боже.
Иже во святых отца нашего Иоанна, архиепископа Константинопольскаго, Златоустаго.
Помяни, Владыко человеколюбче, всякое епископство православных, господина нашего святейшаго патриарха Варфоломея, митрополита Епифания, митрополита Адриана, честное пресвитерство, во Христе диаконство и весь священнический чин: братию и сослужебники наша, священники, диаконы и всю братию нашу, яже призвал еси во Твое общение Твоим благоутробием, Всеблагий Владыко.
И поминает живых и умерших, конечне глаголет сице:
И всех в надежде воскресения, жизни вечныя и Твоего общения усопших православных отец, и братий наших, человеколюбче Господи.
Помяни, Господи, и мое недостоинство и прости ми всякое согрешение, вольное же и невольное.
Кадило Тебе приносим, Христе Боже наш, в воню благоухания духовнаго, еже прием в пренебесный Твой жертвенник, возниспосли нам благодать Пресвятаго Твоего Духа.
И пришедши звезда, ста верху, идеже бе отроча.
Господь воцарися, в лепоту облечеся: облечеся Господь в силу и препоясася. Ибо утверди вселенную, яже не подвижится. Готов престол Твой оттоле, от века Ты еси. Воздвигоша реки, Господи, воздвигоша реки гласы своя, возмут реки сотрения своя, от гласов вод многих. Дивны высоты морския, дивен в высоких Господь. Свидения Твоя уверишася зело. Дому Твоему подобает святыня, Господи, в долготу дний.
Покры небеса добродетель Твоя, Христе, и хвалы Твоея исполнь земля.
Покрый нас кровом крилу Твоею, отжени от нас всякаго врага и супостата. Умири нашу жизнь, Господи, помилуй нас и мир Твой и спаси душы наша, яко благ и человеколюбец.
Благословен Бог наш, сице благоволивый, слава Тебе всегда, ныне и присно, и во веки веков. Аминь.
Боже, Боже наш, небесный Хлеб, Пищу всему миру, Господа нашего и Бога Иисуса Христа, пославый спаса и избавителя и благодетеля, благословяща и освящающа нас, сам благослови предложение сие и приими е в пренебесный Твой жертвенник. Помяни, яко благ и человеколюбец, принесших и ихже ради принесоша: и нас неосуждены сохрани во священнодействии божественных Твоих таин яко святися и прославися пречестное и великолепое имя Твое: Отца, и Сына, и святаго Духа ныне и присно, и во веки веков. Аминь.
Слава Тебе, Христе Боже, упование наше, слава Тебе. Слава, и ныне: Господи, помилуй, трижды.
Воскресый из мертвых: Аще же будень:
Христос истинный Бог наш, молитвами пречистыя своея Матере, иже во святых отца нашего Иоанна, архиепископа Константинопольскаго, Златоустаго, и всех святых, помилует и спасет нас, яко благ и человеколюбец. Аминь.
Во гробе плотски, во аде же с душею яко Бог, в раи же с разбойником, и на престоле был еси, Христе, со Отцем и Духом, вся исполняяй, неописанный.
Таже псалом 50.
Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Слава в вышних Богу, и на земле мир, в человецех благоволение. Дважды.
Господи, устне мои отверзеши, и уста моя возвестят хвалу Твою.
Благословен Бог наш всегда, ныне и присно, и во веки веков.
Благословенно царство, Отца, и Сына, и святаго Духа, ныне и присно, и во веки веков.
Лик: Аминь.
Миром Господу помолимся.
О свышнем мире, и спасении душ наших, Господу помолимся.
О мире всего мiра, благостоянии святых божиих церквей, и соединении всех, Господу помолимся.
О святем храме сем, и с верою, благоговением и страхом Божиим входящих в онь, Господу помолимся.
О господине нашем митрополите Адриане, честнем пресвитерстве, во Христе диаконстве, о всем причте и людех Господу помолимся.
О богохранимой стране нашей Российской, о стране Украинской, о Святой Земле и о жизни мирной, свободной и праведной Господу помолимся.
О граде сем, о всяком граде, стране, и верою живущих в них, Господу помолимся.
О благорастворении воздухов, о изобилии плодов земных, и временех мирных, Господу помолимся.
О плавающих, путешествующих, недугующих, страждущих, заключенных и о спасении их Господу помолимся.
О страдающих от насилия и несвободы, от войн, о находящихся под обстрелами, о лишившихся дома, еды, лекарств, об изгнанных, о заключенных, о бежавших Господу помолимся.
О противостоящих злу добром, о созидающих мир и правду Господу помолимся.
О избавитится нам от всякия скорби, страдания и тревоги, Господу помолимся.
Заступи, спаси, помилуй, и сохрани нас, Боже, Твоею благодатию.
Пресвятую, пречистую, преблагословенную, славную Владычицу нашу Богородицу и приснодеву Марию, со всеми святыми помянувше, сами себе и друг друга, и весь живот наш Христу Богу предадим.
Тебе, Господи.
Молитва перваго антифона:
Господи Боже наш, егоже держава несказанна, и слава непостижима, егоже милость безмерна, и человеколюбие неизреченно: сам, Владыко, по благоутробию Твоему, призри на ны, и на святый храм сей, и сотвори с нами, и молящимися с нами, богатыя милости Твоя, и щедроты Твоя яко подобает Тебе всякая слава, честь и поклонение Отцу, и Сыну, и Святому Духу ныне, и присно, и во веки веков.
Лик: Аминь.
Первый антифон
Благослови, душе моя, Господа, благословен еси, Господи. Благослови, душе моя, Господа, и вся внутренняя моя Имя Святое Его. Благослови, душе моя, Господа и не забывай всех воздаяний Его: очищающаго вся беззакония твоя, исцеляющаго вся недуги твоя, избавляющего от истления живот твой, венчающаго тя милостию и щедротами, исполняющаго во благих желание твое: обновится яко орля юность твоя. Щедр и милостив Господь, долготерпелив и многомилостив. Благослови, душе моя, Господа, и вся внутренняя моя имя святое Его. Благословен еси Господи.
Паки и паки миром Господу помолимся.
Заступи, спаси, помилуй, и сохрани нас, Боже, Твоею благодатию.
Пресвятую, пречистую, преблагословенную, славную Владычицу нашу Богородицу и приснодеву Марию, со всеми святыми помянувше, сами себе и друг друга, и весь живот наш Христу Богу предадим.
Тебе, Господи.
Молитва втораго антифона:
Господи Боже наш, спаси люди Твоя, и благослови достояние Твое, исполнение церкви Твоея сохрани, освяти любящыя благолепие дому Твоего, Ты тех воспрослави божественною Твоею силою, и не остави нас, уповающих на Тя яко Твоя держава, и Твое есть царство, и сила, и слава, Отца, и Сына, и святаго Духа ныне и присно, и во веки веков.
Лик: Аминь.
Вторый антифон
Хвали, душе моя, Господа. Восхвалю Господа в животе моем, пою Богу моему, дондеже есмь. Не надейтеся на князи, на сыны человеческия, в них же несть спасения. Изыдет дух его, и возвратится в землю свою: в той день погибнут вся помышления его. Блажен, ему же Бог Иаковль помощник его, упование его на Господа Бога своего. Сотворшаго небо и землю, море и вся, яже в них. Хранящаго истину в век, творящаго суд обидимым, дающаго пищу алчущим. Господь решит окованныя, Господь умудряет слепцы. Господь возводит низверженныя, Господь любит праведники. Господь хранит пришельцы, сира и вдову приимет, и путь грешных погубит. Воцарится Господь во век, Бог твой, Сионе, в род и род.
Слава Отцу, и Сыну, и Святому Духу и ныне, и присно, и во веки веков. Аминь.
Единородный Сыне и Слове Божий, Безсмертен Сый, и изволивый спасения нашего ради воплотитися от Святыя Богородицы и Приснодевы Марии, непреложно вочеловечивыйся; распныйся же, Христе Боже, смертию смерть поправый, един Сый Святыя Троицы, спрославляемый Отцу и Святому Духу, спаси нас.
Паки и паки миром Господу помолимся.
Заступи, спаси, помилуй, и сохрани нас, Боже, Твоею благодатию.
Пресвятую, пречистую, преблагословенную, славную Владычицу нашу Богородицу и приснодеву Марию, со всеми святыми помянувше, сами себе и друг друга, и весь живот наш Христу Богу предадим.
Лик: Тебе, Господи.
Молитва третияго антифона:
Иже общыя сия, и согласныя даровавый нам молитвы, иже и двема, или трем, согласующымся о имени Твоем, прошения подати обещавый: сам и ныне раб Твоих прошения к полезному исполни, подая нам в настоящем веце познание Твоея истины, и в будущем живот вечный даруя яко благ и человеколюбец Бог еси, и Тебе славу возсылаем, Отцу, и Сыну, и святому Духу, ныне и присно, и во веки веков.
Лик: Аминь.
Во Царствии Твоем помяни нас, Господи, егда приидеши во Царствии Твоем.
Блажени нищии духом, яко тех есть Царство Небесное.
Блажени плачущии, яко тии утешатся.
Блажени кротции, яко тии наследят землю.
Блажени алчущии и жаждущии правды, яко тии насытятся.
Блажени милостивии, яко тии помиловани будут.
Блажени чистии сердцем, яко тии Бога узрят.
Блажени миротворцы, яко тии сынове Божии нарекутся.
Блажени изгнани правды ради, яко тех есть Царство Небесное.
Блажени есте, егда поносят вам, и изженут, и рекут всяк зол глагол на вы, лжуще Мене ради.
Радуйтеся и веселитеся, яко мзда ваша многа на небесех.
Молитва входа:
Владыко Господи, Боже наш, уставивый на небесех чины, и воинства ангел и архангел в служение Твоея славы: сотвори со входом нашим, входу святых ангелов быти, сослужащих нам, и сославословящих Твою благость яко подобает Тебе всякая слава, честь и поклонение, Отцу, и Сыну и святому Духу, ныне и присно, и во веки веков. Аминь.
Благословен вход святых Твоих всегда: ныне, и присно, и во веки веков.
Премудрость, прости.
Приидите, поклонимся и припадем ко Христу. Спаси ны, Сыне Божий, во святых дивен сый, поющия Ти: Аллилуиа. Единожды.
Аще же неделя:
Воскресый из мертвых, поющыя Ти: Аллилуиа. Единожды.
Таже обычныя тропари.
Первый глас:
Камени запечатану от иудей, и воином стрегущим Пречистое Тело Твое, воскресл еси тридневный, Спасе, даруяй мирови жизнь. Сего ради силы небесныя вопияху Ти, Жизнодавче: слава воскресению Твоему, Христе, слава Царствию Твоему, слава смотрению Твоему, Едине Человеколюбче.
Буди, Господи, милость Твоя на нас, // якоже уповахом на Тя.
Радуйтеся, праведнии, о Господе, правым подобает похвала.
Второй глас:
Егда снизшел еси к смерти, Животе Безсмертный, тогда ад умертвил еси блистанием Божества, егда же и умершия от преисподних воскресил еси, вся силы небесныя взываху: Жизнодавче, Христе Боже наш, слава Тебе.
Крепость моя и пение мое Господь и бысть мне во спасение.
Наказуя наказа мя Господь, смерти же не предаде мя.
Третий глас:
Да веселятся небесная, да радуются земная, яко сотвори державу мышцею Своею Господь, попра смертию смерть, Первенец мертвых бысть, из чрева адова избави нас, и подаде мирови велию милость.
Пойте Богу нашему, пойте, пойте цареви нашему, пойте. Вси языцы, воскликните Богу гласом радования.
Четвертый глас:
Светлую воскресения проповедь от Ангела уведевше Господни ученицы и прадеднее осуждение отвергша, апостолом хвалящася глаголаху: испровержися смерть, воскресе Христос Бог, даруяй мирови велию милость.
Яко возвеличишася дела Твоя, Господи, вся премудростию сотворил еси.
Благослови, душе моя, Господа, Господи Боже мой, возвеличился еси зело.
Пятый глас:
Собезначальное Слово Отцу и Духови, от Девы Рождшееся на спасение наше, воспоим, вернии, и поклонимся, яко благоволи Плотию взыти на Крест, и смерть претерпети, и воскресити умершия славным Воскресением Своим.
Ты, Господи, сохраниши ны, и соблюдеши ны от рода сего и вовек.
Спаси мя, Господи, яко оскуде преподобный.
Шестой глас:
Ангельския силы на гробе Твоем, и стрегущии омертвеша, и стояше Мария во гробе, ищущи Пречистаго Тела Твоего. Пленил еси ад, не искусився от него, сретил еси деву, даруяй живот. Воскресый из мертвых, Господи, слава Тебе.
Спаси, Господи, люди Твоя, и благослови достояние Твое.
К Тебе, Господи, воззову, Боже мой, да не премолчиши от мене.
Седьмой глас:
Разрушил еси Крестом Твоим смерть, отверзл еси разбойнику рай, мироносицам плач преложил еси, и апостолом проповедати повелел еси яко воскресл еси, Христе Боже, даруяй мирови велию милость.
Господь крепость людям Своим даст, Господь благословит люди Своя миром.
Принесите Господеви, сынове Божии, принесите Господеви, сыны овни.
Восьмой глас:
С высоты снисшел еси Благоутробне погребение приял еси тридневное, да нас свободиши страстей, животе и воскресение наше, Господи, слава Тебе.
Помолитеся и воздадите, Господеви, Богу нашему.
Ведом во Иудеи Бог, во Израили велие имя Его.
Суббота:
Воззваша праведнии, и Господь услыша их, и от всех скорбей их избави их.
Многи скорби праведным, и от всех их избавит я Господь.
Блажени, яже избрал и приял еси, Господи, и память их в род и род.
Молитва трисвятаго пения.
Боже Святый, иже во святых почиваяй, иже трисвятым гласом от серафимов воспеваемый, и от херувимов славословимый, и от всякия небесныя силы покланяемый: иже от небытия во еже быти приведый всяческая, создавый человека по образу Твоему и по подобию, и всяким Твоим дарованием украсивый: даяй просящему премудрость и разум, и не презираяй согрешающего, но полагаяй на спасение покаяние: сподобивый нас, смиренных и недостойных раб Твоих, и в час сей стати пред славою святаго Твоего Жертвенника и должное Тебе поклонение и славословие приносити: сам, Владыко, приими и от уст нас грешных трисвятую песнь и посети ны благостию Твоею. Прости нам всякое согрешение, вольное же и невольное, освяти наша душы и телеса, и даждь нам в преподобии служити Тебе вся дни живота нашего, молитвами Святыя Богородицы и всех святых, от века Тебе благоугодивших яко свят еси, Боже наш, и Тебе славу возсылаем: Отцу, и Сыну, и Святому Духу, ныне и присно и во веки веков. Аминь.
Вонмем.
Мир всем.
И духови твоему.
Премудрость.
Аллилуия:
Первый глас:
Бог даяй отмщение мне и покоривый люди под мя.
Величай спасения царева и творяй милость Христу своему Давиду и семени его до века.
Второй глас:
Услышит тя Господь в день печали, защитит тя имя Бога Иаковля.
Господи, спаси царя и услыши ны, в оньже аще день призовем Тя.
Третий глас:
На Тя, Господи, уповах, да не постыжуся во век.
Буди ми в Бога защитителя и в дом прибежища, еже спасти мя.
Четвертый глас:
Наляцы и успевай, истины ради и кротости и правды.
Возлюбил еси правду и возненавидел еси беззаконие.
Пятый глас:
Милости Твоя, Господи, во век воспою, в род и род возвещу истину Твою усты моими.
Зане рекл еси: в век милость созиждется, на небесех уготовится истина Твоя.
Шестой глас:
Живый в помощи Вышняго, в дворех Бога небеснаго водворится.
Речет Господеви: заступник мой еси и прибежище мое, Бог мой и уповаю на Него.
Седьмой глас:
Благо есть исповедатися Господеви и пети имени Твоему, Вышний.
Возвещати заутра милость Твою, и истину Твою на всяку нощь.
Восьмой глас:
Приидите, возрадуемся Господеви, воскликнем Богу Спасителю нашему.
Предварим лице Его во исповедании, и во псалмех воскликнем Ему.
Молитва прежде евангелия
Возсияй в сердцах наших, человеколюбче Владыко, Твоего богоразумия нетленный свет, и мысленныя наши отверзи очи во евангельских Твоих проповеданий разумение: вложи в нас и страх блаженных Твоих заповедей, да плотския похоти вся поправше, духовное жительство пройдем, вся, яже ко благоугождению Твоему, и мудрствующе и деюще, Ты бо еси просвещение душ и телес наших, Христе Боже, и Тебе славу возсылаем со безначальным Твоим Отцем и всесвятым, и благим, и животворящим Твоим Духом ныне, и присно, и во веки веков. Аминь.
Премудрость, прости, услышим святого евангелиа.
Мир всем. - От ... святаго евангелия чтение. - Слава Тебе, Господи, слава Тебе. - Вонмем.
Рцем вси от всея души и от всего помышления нашего рцем.
Господи Вседержителю, Боже отец наших, молим Ти ся, услыши и помилуй.
Помилуй нас, Боже, по велицей милости Твоей, молим Ти ся, услыши и помилуй.
Лик: Господи, помилуй, трижды.
Молитвы о живых и умерших
Еще молимся о плодоносящих и добродеющих во святем и всечестнем храме сем, труждающихся, поющих и предстоящих людех, ожидающих от Тебе великия и богатыя милости.
Лик: Господи, помилуй, трижды.
Молитва прилежнаго моления:
Господи Боже наш, прилежное сие моление приими от Твоих раб, и помилуй нас по множеству милости Твоея, и щедроты Твоя низпосли на ны и на вся люди Твоя, чающыя от Тебе богатыя милости яко милостив и человеколюбец Бог еси, и Тебе славу возсылаем: Отцу, и Сыну, и святому Духу ныне, и присно и во веки веков. Аминь.
Аще же будет о усопших приношение, диакон, или священник, глаголет ектению сию:
Помилуй нас, Боже, по велицей милости Твоей, молимтися, услыши и помилуй.
Лик: Господи, помилуй, трижды.
Еще молимся о упокоении душ усопших рабов Божиих имя рек, и о еже проститися им всякому прегрешению, вольному же и невольному.
Яко да Господь Бог учинит душы их, идеже праведнии упокояются.
Милости божия, царства небеснаго и оставления грехов их, у Христа, безсмертнаго царя и Бога нашего, просим.
Лик: Подай, Господи.
Господу помолимся.
Лик: Господи, помилуй.
Боже духов и всякия плоти, смерть поправый и диавола упразднивый, и жизнь миру Твоему даровавый: сам, Господи, упокой души усопших рабов Твоих имя рек в месте светле, в месте злачне, в месте покойне, отнюду же отбеже болезнь, печаль и воздыхание. Всякое согрешение, содеянное ими словом, или делом, или помышлением, яко благ и человеколюбец Бог, прости: яко несть человек, иже жив будет и не согрешит, Ты бо един кроме греха, правда Твоя правда во веки и слово Твое истина
Возглас:
Яко Ты еси воскресение и живот, и покой усопших рабов Твоих имя рек, Христе Боже наш, и Тебе славу возсылаем со безначальным Твоим Отцем и пресвятым, и благим, и животворящим Твоим Духом, ныне и присно, и во веки веков.
Лик: Аминь.
Молитва верных первая:
Благодарим Тя, Господи, Боже сил, сподобившаго нас предстати и ныне святому Твоему жертвеннику, и припасти ко щедротам Твоим о наших гресех и о людских неведениих: приими, Боже, моление наше, сотвори ны достойны быти, еже приносити Тебе моления, и мольбы, и жертвы безкровныя о всех людех Твоих: и удовли нас, ихже положил еси в службу Твою сию, силою Духа Твоего cвятаго, неосужденно и непреткновенно, в чистем свидетельстве совести нашея, призывати Тя на всякое время и место: да послушая нас, милостив нам будеши во множестве Твоея благости яко подобает Тебе всякая слава, честь и поклонение: Отцу, и Сыну, и святому Духу ныне и присно, и во веки веков. Аминь.
Молитва верных вторая:
Паки, и многажды Тебе припадаем. и Тебе молимся, благий и человеколюбче, яко да призрев на моление наше, очистиши наша душы и телеса от всякия скверны плоти и духа, и даси нам неповинное и неосужденное предстояние святаго Твоего жертвенника. Даруй же, Боже, и молящымся с нами преспеяние жития и веры и разума духовнаго: даждь им всегда со страхом и любовию служащым Тебе, неповинно и неосужденно причаститися святых Твоих таин, и небеснаго Твоего царствия сподобитися яко да под державою Твоею всегда храними, Тебе славу возсылаем: Отцу, и Сыну, и Святому Духу ныне, и присно, и во веки веков. Аминь.
Священник же глаголет тайно молитву сию:
Никто же достоин от связавшихся плотскими похотьми и сластьми, приходити, или приближатися, или служити Тебе, царю славы: еже бо служити Тебе, велико и страшно и самем небесным силам. Но обаче, неизреченного ради и безмернаго Твоего человеколюбия непреложно и неизменно был еси человек, и архиерей нам был еси, и служебныя сея и бескровныя жертвы священнодействие предал еси нам, яко Владыка всех: Ты бо един, Господи Боже наш, владычествуеши небесными и земными, иже на престоле херувимсте носимый, иже серафимов Господь и Царь Исраилев, иже един свят и во святых почиваяй. Тя убо молю единаго благаго и благопослушливаго: призри на мя, грешнаго и непотребнаго раба Твоего, и очисти мою душу и сердце от совести лукавыя, и удовли мя силою Святаго Твоего Духа, облеченна благодатию священства, предстати святей Твоей сей трапезе и священнодействовати святое и пречистое Твое тело и честную кровь. К Тебе бо прихожду, приклонь мою выю, и молютися, да не отвратиши лица Твоего от мене, ниже отринеши мене от отрок Твоих, но сподоби принесенным Тебе быти, мною грешным и недостойным рабом Твоим, даром сим: Ты бо еси приносяй и приносимый, и приемляй и раздаваемый, Христе Боже наш, и Тебе славу возсылаем, со безначальным Твоим Отцем и пресвятым, и благим, и животворящим Твоим Духом ныне, и присно, и во веки веков. Аминь.
Иже херувимы тайно образующе и животворящей Троице трисвятую песнь припевающе, всякое ныне житейское отложим попечение.
Яко да царя всех подъимем, ангельскими невидимо дориносима чинми. Аллилуиа, аллилуиа, аллилуиа.
Боже, очисти мя, грешнаго.
Возмите руки ваша во святая, и благословите Господа.
Господина нашего имя рек да помянет Господь Бог во царствии своем, всегда, ныне, и присно, и во веки веков.
Всех вас православных христиан, да помянет Господь Бог во царствии своем, всегда, ныне, и присно, и во веки веков.
Благообразный Иосиф, с древа снем пречистое тело Твое, плащаницею чистою обвив, и вонями во гробе нове покрыв положи.
Во гробе плотски, во аде же с душею яко Бог, в раи же с разбойником, и на престоле был еси, Христе, со Отцем и Духом вся исполняяй неописанный.
Яко живоносец, яко рая краснейший, воистинну и чертога всякаго царскаго показася светлейший, Христе, гроб Твой, источник нашего воскресения.
Ублажи, Господи, благоволением Твоим Сиона, и да созиждутся стены иерусалимския: тогда благоволиши жертву правды, возношение и всесожегаемая, тогда возложат на олтарь Твой тельцы.
Ектенья
Исполним молитву нашу Господеви.
О предложенных честных дарех Господу помолимся.
О святем храме сем и с верою, благоговением и страхом Божиим входящих в онь Господу помолимся.
О избавитится нам от всякия скорби, страдания и тревоги Господу помолимся.
Заступи, спаси, помилуй и сохрани нас, Боже, Твоею благодатию.
Дне всего совершенна, свята, мирна и безгрешна у Господа просим.
Ангела мирна, верна наставника, хранителя душ и телес наших у Господа просим.
Прощения и оставления грехов и прегрешений наших у Господа просим.
Добрых и полезных душам нашым и мира мирови у Господа просим.
Прочее время живота нашего в мире и покаянии скончати, у Господа просим.
Христианския кончины живота нашего, безболезненны, непостыдны, мирны, и добраго ответа на страшнем судищи Христове просим.
Пресвятую, пречистую, преблагословенную, славную владычицу нашу Богородицу и приснодеву Марию, со всеми святыми помянувше, сами себе и друг друга, и весь живот наш Христу Богу предадим.
Молитва приношения:
Господи Боже Вседержителю, едине святе, приемляй жертву хваления от призывающих Тя всем сердцем, приими и нас, грешных, моления, и принеси ко святому Твоему жертвеннику, и удовли нас приносити Тебе дары же и жертвы духовныя о наших гресех и о людских неведениих: и сподоби нас обрести благодать пред Тобою, еже быти Тебе благоприятней жертве нашей, и вселитися духу благодати Твоея благому в нас, и на предлежащих дарех сих, и на всех людех Твоих.
Щедротами единороднаго Сына Твоего, с нимже благословен еси, со пресвятым и благим и животворящим Твоим Духом, ныне, и присно, и во веки веков.
Аминь.
Мир всем.
И духови твоему.
Возлюбим друг друга, да единомыслием исповемы.
Отца и Сына и святого Духа, Троицу Единосущную и Нераздельную.
И священник покланяется трижды, глаголя тайно:
Возлюблю Тя, Господи, крепосте моя. Господь утверждение мое и прибежище мое. Трижды.
Христос посреде нас.
И есть, и будет.
Двери, двери, премудростию вонмем.
Верую во единаго Бога Отца, Вседержителя, Творца небу и земли, видимым же всем и невидимым. И во единаго Господа Иисуса Христа, Сына божия, единороднаго, Иже от Отца рожденнаго прежде всех век. Света от света, Бога истинна от Бога истинна, рожденна, несотворенна, единосущна Отцу, Имже вся быша. Нас ради человек и нашего ради спасения сшедшаго с небес и воплотившагося от Духа свята и Марии Девы, и вочеловечшася. Распятаго же за ны при Понтийстем Пилате, и страдавша, и погребенна. И воскресшаго в третий день по Писанием. И возшедшаго на небеса, и седяща одесную Отца. И паки грядущаго со славою судити живым и мертвым, Егоже царствию не будет конца. И в Духа святаго, Господа, животворящаго, иже от Отца исходящаго, иже со Отцем и Сыном спокланяема и сславима, глаголавшаго пророки. Во едину, святую, соборную и апостольскую Церковь. Исповедую едино крещение во оставление грехов. Чаю воскресения мертвых: И жизни будущаго века. Аминь.
Станем добре, станем со страхом, вонмем, святое возношение в мире приносити.
Милость мира, жертву хваления.
Благодать Господа нашего Иисуса Христа, и любы Бога и Отца, и причастие святаго Духа буди со всеми вами.
И со духом твоим.
Горе имеим сердца.
Имамы ко Господу.
Благодарим Господа.
Достойно и праведно есть поклонятися Отцу и Сыну и святому Духу, Троице единосущней и нераздельней.
Достойно и праведно Тя пети, Тя благословити, Тя хвалити, Тя благодарити, Тебе покланятися на всяком месте владычествия Твоего: Ты бо еси Бог неизреченен, недоведом, невидим, непостижим, присно сый, такожде сый, Ты, и единородный Твой Сын, и Дух Твой святый: Ты от небытия в бытие нас привел еси, и отпадшыя возставил еси паки, и не отступил еси, вся творя, дондеже нас на небо возвел еси, и царство Твое даровал еси будущее. О сих всех благодарим Тя, и единороднаго Твоего Сына, и Духа Твоего cвятаго, о всех, их же вемы и их же не вемы, явленных и неявленных благодеяниих бывших на нас. Благодарим Тя и о службе сей, юже от рук наших прияти изволил еси, аще и предстоят Тебе тысящы архангелов и тьмы ангелов, херувимы и серафимы, шестокрилатии, многоочитии, возвышающиися пернатии
Победную песнь поюще, вопиюще, взывающе и глаголюще.
Свят, cвят, cвят Господь cаваоф, исполнь небо и земля славы Твоея: осанна в вышних, благословен грядый во имя Господне, осанна в вышних.
С сими и мы блаженными силами, Владыко человеколюбче, вопием и глаголем: свят еси и пресвят Ты и единородный Твой Сын, и Дух Твой святый: свят еси и пресвят, и великолепна слава Твоя, иже мир Твой тако возлюбил еси, якоже Сына Твоего единороднаго дати, да всяк веруяй в Него не погибнет, но имать живот вечный: иже пришед, и все еже о нас смотрение исполнив, в нощь, в нюже предаяшеся, паче же сам себе предаяше за мирский живот, прием хлеб во святыя своя и пречистыя и непорочныя руки, благодарив и благословив, освятив, преломив, даде святым своим учеником и апостолом, рек:
Приимите, ядите, сие есть тело мое, еже за вы ломимое, во оставление грехов.
Аминь.
Подобно и чашу по вечери, глаголя:
Пийте от нея вси, сия есть кровь моя новаго завета, яже за вы и за многи изливаемая во оставление грехов.
Аминь.
Поминающе убо спасительную сию заповедь, и вся, яже о нас бывшая: крест, гроб, тридневное воскресение, на небеса восхождение, одесную седение, второе и славное паки пришествие.
Твоя от Твоих Тебе приносяще о всех и за вся.
Тебе поем, Тебе благословим, Тебе благодарим, Господи, и молимтися, Боже наш.
Еще приносим Ти словесную сию и безкровную службу, и просим, и молим, и милися деем: низпосли Духа Твоего Святаго на ны и на предлежащыя дары сия.
[Священник:
Господи, иже пресвятаго Твоего Духа в третий час апостолом Твоим низпославый, того, Благий, не отими от нас, но обнови нас, молящихтися.
Диакон стих:
Сердце чисто созижди во мне, Боже, и дух прав обнови во утробе моей.
Паки священник:
Господи, иже пресвятаго Твоего Духа:
Диакон стих:
Не отвержи мене от Лица Твоего и Духа Твоего святаго не отими от мене.
И паки священник:
Господи, иже пресвятаго Твоего Духа:]
И сотвори убо хлеб сей, честное Тело Христа Твоего. Аминь.
А еже в чаши сей, честную кровь Христа Твоего. Аминь.
Преложив Духом Твоим святым. Аминь, аминь, аминь.
Якоже быти причащающымся, во трезвение души, во оставление грехов, в приобщение святаго Твоего Духа, во исполнение царствия небеснаго, в дерзновение еже к Тебе, не в суд или во осуждение.
Еще приносим Ти словесную сию службу о иже в вере почивших праотцех, отцех, патриарсех, пророцех, апостолех, проповедницех, евангелистех, мученицех, исповедницех, воздержницех, и о всяком дусе праведнем, в вере скончавшемся.
Изрядно о пресвятей, пречистей, преблагословенной, славней Владычице нашей Богородице и приснодеве Марии.
Достойно есть, яко воистину блажити Тя, Богородицу, присноблаженную и пренепорочную и Матерь Бога нашего. Честнейшую херувим и славнейшую без сравнения серафим, без истления Бога Слова рождшую, сущую Богородицу Тя величаем.
Или за Достойно поется ирмос с припевом праздника.
Священник же молится:
О святем Иоанне пророце, предтечи и крестители, о святых славных и всехвальных апостолех, о святом имя рек, егоже и память совершаем, и о всех святых Твоих, их же молитвами посети нас, Боже.
И помяни всех усопших о надежди воскресения жизни вечныя.
И поминает, ихже хощет, усопших по именом.
И упокой их, идеже присещает свет лица Твоего.
Еще молим Тя, помяни, Господи, всякое епископство православных, право правящих слово Твоея истины, всякое пресвитерство, во Христе диаконство, и всякий священнический чин.
Еще приносим Ти словесную сию службу о вселенней, о святей соборней и апостольстей Церкви, о иже в чистоте и честнем жительстве пребывающих: о предержащих властех наших, да и мы в тишине его (их) тихое и безмолвное житие поживем, во всяком благочестии и чистоте.
В первых помяни, Господи, господина нашего патриарха Варфоломея, митрополита Епифания, митрополита Адриана, их же даруй святым Твоим церквам в мире, целых, честных, здравых, долгоденствующих, право правящих слово Твоея истины.
И всех и вся.
Помяни, Господи, град сей, в нем же живем, и всякий град и страну и верою живущих в них. Помяни, Господи, плавающих, путешествующих, недугующих, страждущих, плененных, и спасение их. Помяни, Господи, плодоносящих и добротворящих во святых Твоих церквах, и поминающих убогия, и на вся ны милости Твоя низпосли.
И даждь нам единеми усты и единем сердцем славити и воспевати пречестное и великолепое имя Твое, Отца и Сына и святаго Духа, ныне и присно, и во веки веков.
Аминь.
И да будут милости великаго Бога и Спаса нашего Иисуса Христа со всеми вами.
И со духом твоим.
Вся святыя помянувше, паки и паки миром Господу помолимся.
О принесенных и освященных Честных Дарех Господу помолимся.
Яко да человеколюбец Бог наш, прием я во святый и пренебесный и мысленный cвой жертвенник, в воню благоухания духовнаго, возниспослет нам божественную благодать и дар cвятаго Духа, помолимся.
О избавитится нам от всякия скорби, страдания и тревоги Господу помолимся.
Заступи, спаси, помилуй и сохрани нас, Боже, Твоею благодатию.
Дне всего совершенна, свята, мирна и безгрешна у Господа просим.
Ангела мирна, верна наставника, хранителя душ и телес наших у Господа просим.
Прощения и оставления грехов и прегрешений наших у Господа просим.
Добрых и полезных душам нашим и мира мирови, у Господа просим.
Прочее время живота нашего в мире и покаянии скончати, у Господа просим.
Христианския кончины живота нашего, безболезненны, непостыдны, мирны и добраго ответа на страшнем судищи Христове, просим.
Соединение веры и причастие Святаго Духа испросивше, сами себе, и друг друга, и весь живот наш Христу Богу предадим.
Священник же молится:
Тебе предлагаем живот наш весь и надежду, Владыко человеколюбче, и просим, и молим, и мили ся деем: сподоби нас причаститися небесных Твоих и страшных таин, сея священные и духовныя трапезы, с чистою совестию, во оставление грехов, в прощение согрешений, во общение Духа cвятаго, в наследие царствия небеснаго, в дерзновение еже к Тебе, не в суд или во осуждение и сподоби нас, Владыко, со дерзновением, неосужденно смети призывати Тебе, небеснаго Бога Отца, и глаголати.
Отче наш, Иже еси на небесех, да святится имя Твое, да приидет Царствие Твое: да будет воля Твоя, яко на небеси и на земли. Хлеб наш насущный даждь нам днесь: и остави нам долги наша, якоже и мы оставляем должником нашим: и не введи нас во искушение, но избави нас от лукаваго яко Твое есть царство, и сила, и слава, Отца, и Сына, и святаго Духа, ныне и присно, и во веки веков. Аминь.
Мир всем.
И духови твоему.
Главы ваша Господеви приклоните.
Тебе, Господи.
Священник молится:
Благодарим Тя, царю невидимый, иже неисчетною Твоею силою вся содетельствовал еси, и множеством милости Твоея от небытия в бытие вся привел еси. Сам, Владыко, с небесе призри на подклоньшыя Тебе главы своя: не бо подклониша плоти и крови, но Тебе страшному Богу. Ты убо, Владыко, предлежащая всем нам во благое изравняй, по коегождо своей потребе: плавающым сплавай, путешествующим спутешествуй, недугующыя исцели, врачу душ и телес благодатию, и щедротами, и человеколюбием единороднаго Сына Твоего, с нимже благословен еси, со пресвятым и благим и животворящим Твоим Духом, ныне, и присно, и во веки веков.
Аминь.
Священник же молится:
Вонми, Господи Иисусе Христе, Боже наш, от святаго жилища Твоего и от престола славы царствия Твоего, и прииди во еже освятити нас, иже горе со Отцем седяй, и зде нам невидимо спребываяй: и сподоби державною Твоею рукою преподати нам пречистое тело Твое и честную кровь, и нами всем людем.
Боже, очисти мя, грешного, и помилуй мя.
Вонмем.
Священник же, вознося святый хлеб, возглашает:
Святая святым.
Един свят, един Господь Иисус Христос, во славу Бога Отца. Аминь.
Священник же, разрезая на четыре части со вниманием и благоговением, глаголет:
Раздробляется и разделяется агнец божий, раздробляемый и неразделяемый, всегда ядомый и никогдаже иждиваемый, но причащающыяся освящаяй.
Исполнение Духа святаго. Аминь.
Благословенна теплота святых Твоих, всегда, ныне и присно, и во веки веков. Аминь.
Теплота веры, исполнь Духа святаго. Аминь.
Священник едину частицу святаго хлеба, глаголет:
Честное и пресвятое Тело Господа и Бога и Спаснашего Иисуса Христа преподается мне, Иакову священнику, во оставление грехов моих и в жизнь вечную.
Верую, Господи, и исповедую, яко Ты еси воистину Христос, Сын Бога живаго, пришедый в мир грешныя спасти, от нихже первый есмь аз. Еще верую, яко сие есть cамое пречистое тело Твое и cия есть cамая честная кровь Твоя. Молюся убо Тебе: помилуй мя, и прости ми прегрешения моя, вольная и невольная, яже словом, яже делом, яже ведением и неведением: и сподоби мя неосужденно причаститися пречистых Твоих таинств, во оставление грехов и в жизнь вечную. Аминь.
Вечери Твоея тайныя днесь, Сыне Божий, причастника мя приими: не бо врагом Твоим тайну повем, ни лобзания Ти дам, яко Иуда, но яко разбойник исповедаю Тя: помяни мя, Господи, во Царствии Твоем.
Да не в суд или во осуждение будет мне причащение cвятых Твоих таин, Господи, но во исцеление души и тела.
Таже священник восклонься приемлет обема руками с покровцем святый потир и причащается трижды из него, глаголя:
Честныя и святыя крове Господа Бога и Спаса нашего Иисуса Христа причащаюся аз, раб Божий, священник имя рек во оставление грехов моих и в жизнь вечную. Аминь.
И тако свои устне и край святаго потира в руку держимым платом отер, глаголет:
Се прикоснуся устнам моим, и отимет беззакония моя, и грехи моя очистит.
Со страхом Божиим и верою приступите.
Благословен грядый во имя Господне, Бог Господь и явися нам.
Воскресение Христово видевше, поклонимся святому Господу Иисусу, единому безгрешному. Кресту Твоему покланяемся, Христе, и святое воскресение Твое поем и славим: Ты бо еси Бог наш, разве Тебе иного не знаем, имя Твое именуем. Приидите вси вернии, поклонимся святому Христову воскресению: се бо прииде крестом радость всему миру, всегда благословяще Господа, поем воскресение его: распятие бо претерпев, смертию смерть разруши.
Светися, светися, новый Иерусалиме, слава бо Господня на тебе возсия. Ликуй ныне и веселися, Сионе: ты же, чистая красуйся, Богородице, о востании рождества твоего.
О Пасха велия и священнейшая, Христе! О мудросте, и слове божий, и сило! Подавай нам истее Тебе причащатися в невечернем дни царствия Твоего.
Отирает святою губою зело добре, со вниманием и благоговением глаголя словеса сия:
Омый, Господи, грехи поминавшихся зде кровию Твоею честною, молитвами святых Твоих.
Священник же благословляет люди, возглашая:
Спаси, Боже, люди Твоя и благослови достояние Твое.
И обращается священник к святей трапезе и кадит трижды, глаголя в себе:
Вознесися на небеса, Боже, и по всей земли слава Твоя.
Видехом свет истинный, прияхом Духа небесного, обретохом веру истинную, нераздельней Троице поклоняемся: та бо нас спасла есть.
Благословен Бог наш Всегда, ныне, и присно, и во веки веков.
Аминь.
Да исполнятся уста наша хваления Твоего, Господи, яко да поем славу Твою, яко сподобил еси нас причаститися cвятым Твоим, божественным, безсмертным и животворящим тайнам: соблюди нас во Твоей святыни, весь день поучатися правде Твоей. Аллилуиа, аллилуиа, аллилуиа.
Прости приимше божественных, святых, пречистых, безсмертных, небесных и животворящих, страшных Христовых таин, достойно благодарим Господа.
Заступи, спаси, помилуй и сохрани нас, Боже, Твоею благодатию.
День весь совершен, свят, мирен и безгрешен испросивше, сами себе, и друг друга, и весь живот наш Христу Богу предадим.
Молитва благодарения.
Благодарим Тя, Владыко человеколюбче, благодетелю душ наших, яко и в настоящий день сподобил еси нас небесных Твоих и безсмертных таинств. Исправи наш путь, утверди ны во страсе Твоем вся, соблюди наш живот, утверди наша стопы, молитвами и моленьми славныя Богородицы и приснодевы Марии, и всех святых Твоих яко Ты еси освящение наше, и Тебе славу возсылаем, Отцу, и Сыну, и святому Духу, ныне, и присно, и во веки веков. Аминь.
С миром изыдем.
О имени Господни.
Господу помолимся.
Господи, помилуй.
Господи, Ти благословляєш тих, що Тебе благословляють, і освячуєш тих, що на Тебе надію покладають. Спаси людей Твоїх і благослови насліддя Твоє, повноту Церкви Твоєї збережи, освяти тих, що люблять красу дому Твого, прослав їх Твоєю божественною силою і не остав нас, що надіємось на Тебе. Спокій світові Твоєму дай, Церквам Твоїм, священикам, боголюбивій і Богом береженій Україні нашій, парафіянам святого храму цього і всім людям Твоїм. Бо всяке добре даяння і всякий звершений дар з висоти є, сходячи від Тебе, Отця світла, і Тобі славу, подяку і поклоніння віддаємо, Отцю, і Сину, і Святому Духові, нині, і повсякчас, і на віки вічні.
Благословляяй благословящыя Тя, Господи, и освящаяй на Тя уповающыя, спаси люди Твоя и благослови достояние Твое, исполнение Церкве Твоея сохрани, освяти любящыя благолепие дому Твоего: Ты тех возпрослави Божественною Твоею силою, и не остави нас, уповающих на Тя. Мир мiрови Твоему даруй, Церквам Твоим, священником и всем людем Твоим. Яко всякое даяние благо, и всяк дар совершен свыше есть, сходяй от Тебе, Отца светов, и Тебе славу, и благодарение, и поклонение возсылаем, Отцу, и Сыну, и святому Духу ныне и присно, и во веки веков. Аминь.
Таже: Буди имя Господне трижды, и псалом 33:
Благословлю Господа на всякое время, выну хвала его во устех моих. О Господе похвалится душа моя: да услышат кротцыи и возвеселятся. Возвеличите Господа со мною, и вознесем имя его вкупе. Взысках Господа, и услыша мя и от всех скорбей моих избави мя. Приступите к нему и просветитеся, и лица ваша не постыдятся. Сей нищий воззва, и Господь услыша и, и от всех скорбей его спасе и. Ополчится ангел Господень окрест боящихся его и избавит их. Вкусите и видите, яко благ Господь: блажен муж, иже уповает нань. Удержи язык твой от зла и устне твои, еже не глаголати льсти. Уклонися от зла и сотвори благо: взыщи мира и пожени и.
Или один раз ХВ.
Благословение Господне на вас, Того благодатию и человеколюбием, всегда, ныне, и присно, и во веки веков.
Аминь.
Слава Тебе, Христе Боже, Упование наше, слава Тебе.
Слава, и ныне: Господи, помилуй, трижды. Благослови.
Либо вместо "Слава Тебе" трижды ХВ.
Христос, истинный Бог наш, молитвами Пречистыя Своей Матере (и прочая), иже во святых отца нашего Иоанна, архиепископа Константина града, Златоустаго ... и всех святых, помилует и спасет нас, яко благ и человеколюбец.
Исполнение закона и пророков сам сый, Христе Боже наш, исполнивый все отеческое смотрение, исполни радости и веселия сердца наша, всегда, ныне и присно, и во веки веков. Аминь.